Buon Natale ! Tu scendi dalle stelle – Quanno nascette Ninno

2007 Dicembre 23
by Blumy


from → # Antonella Pizzo, # Blumy

8 Responses leave one →
  1. 2007 Dicembre 23
    antonella permalink

    Quanno nascette Ninno,
    quanno nascette Ninno a Betlemme,
    era notte e pareva miezojuorno…
    Maje le stelle,
    lustre e belle,
    se vedèttero accussí…
    e ‘a cchiù lucente,
    jette a chiammá li Magge a ll’Uriente.
    Maje le stelle,
    lustre e belle,
    se vedèttero accussí…
    se vedèttero accussí…

    II
    De pressa se scetajeno
    de pressa se scetajeno ll’aucielle…
    cantanno de na forma tutta nova:
    Pe’ nsi’ ‘agrille,
    co’ li strille,
    e zompanno ‘a ccá e ‘a llá:
    - E’ nato! E’ nato! -
    - decévano – lo Dio che nce ha criato! -
    Pe’ nsi’ ‘agrille,
    co li strille
    e zompanno ‘a ccá e ‘a llá…
    – E’ nato! E’ nato! -
    - decévano – lo Dio che nce ha criato! -

    III
    Co’ tutto ch’era vierno,
    co’ tutto ch’era vierno, Ninno bello,
    nascettero a migliara rose e sciure…
    Pe’ nsi’ ‘o ffieno,
    sicco e tuosto,
    ca fuje puosto sott’a te,
    se ‘nfigliulette
    e de frunnelle e sciure se vestette…
    pe’ nsí’ ‘o ffieno,
    sicco e tuosto,
    ca fuje puosto sott’a te,
    se ‘nfigliulette
    e de frunnelle e sciure se vestette…

    IV
    A no paese che,
    a no paese che se chiamma Ngadde,
    sciurettero le vvigne e ascette ll’uva.
    Ninno mio
    sapuretiello,
    rappusciello d’uva si’ tu…
    ca, tutt’ammore,
    faje doce ‘a vocca e po’ ‘mbriache ‘e core!
    Ninno mio,
    sapuretiello,
    rappusciello d’uva si’ tu…
    ca, tutt’ammore,
    faje doce ‘a vocca e po’ ‘mbriache ‘e core!

    V
    Non c’erano nemice
    non c’erano nemice pe’ la terra:
    La pecora pasceva co’ ‘o lione
    Co”o capretto,
    se vedette
    ‘o liupardo pazzeá…
    Ll’urzo e ‘o vetiello
    e, co’ lo lupo, ‘mpace ‘o pecoriello.
    co’ ‘o capretto,
    se vedette
    ‘o liupardo pazzeá…
    Ll’urzo e ‘o vetiello
    e, co’ lo lupo, ‘mpace ‘o pecoriello.

    VI
    S’arrevotaje ‘nsomma
    s’arrevotaje ‘nsomma tutt”o munno:
    lo cielo, ‘a terra, ‘o mare e tutt”e ggente…
    Chi dormeva,
    se senteva
    ‘mpiett”o core pazzeá
    pe’ la prejezza;
    E se sonnava pace e contentezza…
    Chi dormeva
    se senteva
    ‘mpiett”o core pazzeá
    pe’ la prejezza;
    E se sonnava pace e contentezza…

    VII
    Guardavano le ppecore,
    guardavano le ppecore, ‘e Pasture…
    E n’Angelo, sbrennente cchiù d”o sole,
    Comparette
    e lle decette:
    - No ve spaventate, no!
    Contento e riso!
    la terra è addeventata Paraviso! -
    Comparette
    e lle decette:
    - No ve spaventate, no!
    Contento e riso!
    la terra è addeventata Paraviso! –

    VIII
    A vuje è nato ogge,
    A vuje è nato ogge, a Bettalemme,
    d”o munno, ll’aspettato Sarvatore…
    Dint”e panne
    ‘o trovarrite,
    non potite maje sgarrá,
    arravogliato…
    e dint’a lu Presebbio corecato…
    Dint”e panne
    ‘o trovarrite,
    non potite maje sgarrá,
    arravogliato…
    e dint’a lu Presebbio corecato…

    IX
    A meliune ll’Angiule
    a meliune ll’Angiule calaro…
    co’ chiste se mettettero a cantare;
    - Gloria a Dio,
    pace ‘nterra
    Nu’ cchiù guerra…è nato giá
    lo rre d’ammore
    che dá prejezza e pace a ogne core…
    Gloria a Dio,
    pace ‘nterra
    Nu’ cchiù guerra…è nato giá
    lo rre d’ammore
    che dá prejezza e pace a ogne core…

    X
    Sbatteva ‘o core ‘mpietto
    sbatteva ‘o core ‘mpietto a sti Pasture
    e ll’uno po’ deceva ‘nfacci’a ll’ato:
    - Ché tardammo?
    priesto, jammo
    ca mme sento ascevolí
    pe’ lo golío
    ca tengo de vedé stu Ninno Dio!…
    - Ché tardammo?
    priesto, jammo
    ca mme sento ascevolí
    pe’ lo golío
    ca tengo de vedé stu Ninno Dio!…

    XI
    Zompanno comm’a ciévere
    zompanno comm’a ciévere ferute,
    jettero li pasture a la capanna…
    Llá trovajeno
    a Maria
    co’ Giusepe e ‘a Gioja mia
    e ‘nchillo Viso
    provajeno no muorzo ‘e Paraviso..
    Llá trovajeno
    a Maria
    co’ Giusepe e ‘a Gioja mia
    e ‘nchillo Viso
    provajeno no muorzo ‘e Paraviso..

    XII
    Restajeno ‘ncantate
    restajeno ‘ncantate e voccapierte
    pe’ tantu tiempo senza di’ parola…
    po’ jettanno,
    lacremanno,
    no sospiro pe’ sfogá…
    da dint”o core,
    cacciajeno, a migliara, atte d’ammore.
    Po’ jettanno
    lacremanno,
    no sospiro pe’ sfogá…
    da dint”o core,
    cacciajeno, a migliara, atte d’ammore.

    XIII
    C”a scusa de donare
    c”a scusa de donare li presiente
    se jettero azzeccanno chiano chiano…
    Ninno no’
    li rifiutaje
    ll’azzettaje, comm’a che,
    po’ lle mettette
    la mano ‘ncapa e li benedicette…
    Ninno no’
    li rifiutaje
    ll’azzettaje, comm’a che,
    po’ lle mettette
    la mano ‘ncapa e li benedicette…

    XIV
    Piglianno confedenzia
    piglianno confedenzia a poco a poco,
    cercajeno lecenzia a la Madonna…
    Se magnajeno
    li pedille
    co vasille, ‘mprimma e po’
    chelle mmanelle…
    a ll’urdemo, lo musso e ‘e mascarielle…
    Se magnajeno
    li pedille
    co vasille, ‘mprimma e po’
    chelle mmanelle…
    a ll’urdemo, lo musso e ‘e mascarielle…

    XV
    Po’ assieme se mettettero
    po’ assieme se mettettero a sonare
    e a cantá co’ ll’Angiule e Maria
    co’ na voce,
    accossí doce,
    ca Gesù facette: Aaaah – há…
    e po’ chiudette
    chill’uocchie aggraziate e s’addurmette.
    Co’ na voce
    accossí doce,
    ca Gesù facette: Aaaah – há…
    e po’ chiudette
    chill’uocchie aggraziate e s’addurmette.

    XVI
    La nonna che cantajeno
    la nonna che cantajeno a me mme pare
    ch’avett”a èsse’ chella ca mo dico:
    Ma ‘nfrattanto
    io la canto,
    ‘mmaggenateve de stá
    co li pasture
    vicino a Ninno bello vuje pure…
    Ma ‘nfrattanto
    io la canto,
    ‘mmaggenateve de stá
    co li pasture
    vicino a Ninno bello vuje pure…

    I
    Viene suonno da lu cielo,
    viene adduorme a sto Nennillo…
    pe’ pietá ch’è piccerillo,
    viene suonno e nun tardá.

    II
    Gioja bella de sto core,
    vorría suonno addeventare,
    doce doce pe’ te fare
    st’uocchie belle addormentá…

    III
    Ma si Tu, p’essere amato,
    Te si’ fatto Bammeniello…
    Sulo Ammore è ‘o sonnariello
    che dormire te pò fá…

    IV
    Ment’è chesto puó’ fá nonna
    pe’ te st’arma è arza e bona
    T’amo t’a…Uh, ’sta canzona
    giá t’ha fatto addobbecá!
    …T’amo Dio, bello mio
    t’amo Gioja, t’amo, t’a'…

    XVII
    Cantanno po’ e sonanno
    cantanno po’ e sonanno, li Pasture,
    tornajeno a le mantre n’ata vota:
    ma che vuó’
    che cchiù arrecietto
    non trovajeno ‘int’a lo pietto…
    a ‘o caro Bene,
    facevano ogne poco ‘o va’ e biene…
    ma che vuó’
    che cchiù arrecietto
    non trovajeno ‘int’a lo pietto…
    a ‘o caro Bene,
    facevano ogne poco ‘o va’ e biene…

    XVIII
    Lo ‘nfierno solamente
    lo ‘nfierno solamente e ‘e peccature
    ‘ncocciuse comm’a isso e ostinate
    se mettettero
    appaura,
    pecché a ‘o scuro vonno stá
    li spurtagliune,
    fujenno da lu sole, li briccune…
    Se mettettero
    appaura,
    pecché a ‘o scuro vonno stá
    li spurtagliune,
    fujenno da lu sole, li briccune…

    XIX
    Io pure sóngo niro
    io pure sóngo niro peccatore
    ma non boglio èsse’ cuoccio e ostinato
    Io non boglio
    cchiù peccare…
    voglio amare, voglio stá
    co’ Ninno bello
    comme nce sta lo voje e ll’aseniello…
    Io non boglio
    cchiù peccare…
    voglio amare, voglio stá
    co’ Ninno bello
    comme nce sta lo voje e ll’aseniello…

    XX
    Nennillo mio Tu si’
    Nennillo mio Tu si’ sole d’ammore!
    Faje luce e scarfe pure ‘o peccatore…
    Quanno è tutto
    niro e brutto
    comm’a pece, tanno cchiù
    lo tiene mente…
    e ‘o faje addeventá bello e sbrennente…
    Quanno è tutto
    niro e brutto
    comm’a pece, tanno cchiù
    lo tiene mente…
    e ‘o faje addeventá bello e sbrennente…

    XXI
    Ma tu mme diciarraje
    ma tu mme diciarraje ca chiagniste…
    acciò chiagnesse pure ‘o peccatore!
    Aggio tuorto!
    Ahje! fosse muorto
    n’ora primma de peccá!
    Tu mm’haje amato
    e io, pe’ paga, t’aggio maltrattato…
    Aggio tuorto
    Ahje! fosse muorto
    n’ora primma de peccá!
    Tu mm’haje amato
    e io, pe’ paga, t’aggio maltrattato…

    XXII
    E vuje uocchie mieje
    e vuje uocchie mieje, doje fontane
    avit”a fá, de lacreme, chiagnenno…
    pe’ lavare,
    pe’ scarfare,
    li pedille de Giesù
    chisá, placato,
    decesse: “Via, ca t’aggio perdonato!”
    Pe’ lavare
    pe’ scarfare,
    li pedille de Giesù
    chisá, placato,
    decesse: “Via, ca t’aggio perdonato!”

    XXIII
    Viato a me si aggio
    viato a me si aggio ’sta fortuna!
    Che maje potesse cchiù desiderare?
    O Maria,
    speranza mia
    mentr’io chiagno, prega tu;
    penza ca pure
    si’ fatta mamma de li peccature.
    O Maria
    … speranza mia
    mentr’io chiagno, prega tu;
    penza ca pure
    si’ fatta mamma de li peccature.

  2. 2007 Dicembre 24
    Blumy permalink

    questa si che è una sciccheria ! :D

  3. 2007 Dicembre 24
    antonella permalink

    Sant’Alfonso Maria de’ Liguori (Napoli 1696 – Pagani 1787) …

  4. 2007 Dicembre 24
    Antonio Fiori permalink

    La santità del quotidiano. Grazie Blumy, grazie Antonella.
    Rinnovati auguri
    Antonio

  5. 2007 Dicembre 24
    marinaraccanelli permalink

    grazie anche da parte mia a Blumy e Antonella, ma che bel lavoro avete fatto voi due, una scelta raffinata e piacevolissima insieme:-)
    marina

  6. 2007 Dicembre 24
    mariapia permalink

    Con difficoltà della lingua a capire tutto, ma ringrazio voi tutte della bella scelta, e in tema.

    BUON NATALE A NOI TUTTE, VIADELLEBELLEDONNE!
    da MPia

  7. 2007 Dicembre 25
    annamariaferramosca permalink

    Immagini e canto che sedimentano , fissano l’unicità dell’ora e noi stessi in un tempo fuori dal tempo. Al di là dell’evento. Dicono la capacità umana d’amore. Grazie, sorelle, per aver lavorato a questa nascita.
    annamaria

  8. 2007 Dicembre 25
    Blumy permalink

    e quanto mi piace essere chiamata sorella ! :D

Leave a Reply

Note: You can use basic XHTML in your comments. Your email address will never be published.

Subscribe to this comment feed via RSS